Gratis og uforpliktande verdivurdering

Nokre-og-førti år gamle Hanne bur saman med Andreas og to små born i ei leilegheit som ho vil seie er perfekt for studentar eller einslege. 

Så dukkar draumehuset i sjølve draumegata opp på Finn. Hanne har studert nabolagsprofilane for heile byen, og ingen har betre nabolag enn her. Det er ein ressurssterk bydel med godt utbygde idrettsanlegg og ein høg andel sosialistiske veljarar. Dei tenker ikkje berre på seg sjølve her, nei! 

Viss dei berre får kjøpt det huset, skal ho starte dagen i treningsklede. Ho kjem til å bli så sprek at ho har overskot til alle. Heilt umerkeleg vil ho smelle saman ei røre og servere sveler til alle ungane, og naboane vil vere så gode venner at det er naturleg å ha grillfest saman. Og viss ho berre finn den rette eigedomsmeklaren, vil dei ikkje då få betre takst på leilegheita og «ja» til nytt huslån? 

Vi følger Hanne og Andreas i dagane fram mot bodrunda. Fleire spørsmål melder seg: Kven er det som eigentleg har dratt lasset i alle desse åra? Er lengten etter draumehuset like mykje eit forsøk på å få forholdet til å henge saman? Og kva konsekvensar får fortidas små og store svik for den viktige avgjerda som ligg framfor dei? 

«Gratis og uforpliktande verdivurdering» er basert på boka til Marit Eikemo, ein knakande god pageturner om moderne, norsk kvardagsliv.

---

VELSPELT OG VELLUKKA DRAMATISERING

“…eit særs godt samspel mellom Losnegård og Ottersen”

Dag og Tid

MØRKRET FELL OVER MIDDELKLASSEN

“…ei påtrengande og kraftfull teateroppleving som gjer at vi får auge på vårt eige liv, i vårt eige samfunn.

Norsk Shakespearetidsskrift

VELLYKKET OM BOLIGJAKT

“…en underholdende og småmorsom forestilling som forvalter satiren godt.”

BT

GÅSEHUD-TRIGGANDE

“Kven skulle trudd at noko så «banalt» og så ytst vanleg som eit huskjøp kunne dra meg heilt ut på kanten av stolsetet – og halde meg der?”

Firda

DET GRØNE GRASET PÅ HI SIDA

“Mykje å le av og mykje å kjenna seg att i, ikkje minst fordi Idun Losnegård som Hanne gjer ei overbevisande rolle.”

NRK

NYTT HUS OG GAMLE SVIK

«Det er klasse over samspelet mellom Losnegård og Ottersen» 

Scenekunst.no

---

Framsyningsfoto

Foto: Espen Nyttingnes

Podcast

Høyr regissør Linn Meyer Kongshavn og teatersjef Cecilie Grydeland Lundsholt snakke om årets første produksjon på Teater Vestland: Gratis og uforpliktande verdivurdering, basert på boka til samtidsforfattar Marit Eikemo. Det er ein styrke at så mange kan kjenne seg att i karakterane, men også litt skummelt. Korleis vil publikum oppleve samtidsdramatikk som til dei grader er tett på tida vi lever i? 

SAMTALE MED FORFATTAREN

Dagens dukkehjem

Samtale med forfattar Marit Eikemo

Les meir

Kunstnarleg lag

Forfattar Marit Eikemo
Dramatikar Mari Hesjedal
Regissør Linn Meyer Kongshavn og Cecilie Grydeland Lundsholt
Scenograf og kostymedesignar Mari Lotherington
Komponist Marianne Stranger
Lysdesignar Krystian Myska
Dramaturg Miriam Prestøy Lie
Ansvar for scenisk språkovergang Terje Lyngstad

Medverkande

Idun Losnegård
Kyrre Eikås Ottersen
Carina Furseth
Peder Lauvås