Repertoaret inneheld åtte produksjonar,
deriblant fire urpremierar.

Først ut på turné i januar er Ishuset av Marit Tusvik. Stykket fekk strålande kritikkar etter urpremieren 11. desember i fjor, og turneen har starta med godt besøk og fine tilbakemeldingar frå publikum.

Sogn og Fjordane Teater (SoFt) har dei siste åra samarbeidd godt med Den Nationale Scene (DNS) i Bergen. I år samarbeider vi om stykket Døden av Mick Gordon og Marie de Hennezel, der den tredje og viktigaste samarbeidspartnaren er Bergen Prosjektteater. Stykket er eit unikt vitnesbyrd frå den høgst private siste tida i livet – og eit viktig bidrag i den offentlege samtalen om dødshjelp. Stykket har premiere på Lille Scene på DNS 22. januar.

Visjonen til Soft er å røre folk med opplevingar dei ikkje har hatt før, tufta på verdiane engasjert, modig og inkluderande. Gjennom fleire år har vi gjort det ved å setje opp nye stykke med røter i vår eigen identitet – gjerne gjennom bruk av historier herifrå, eller dramatikarar som bruker i det vestnorske språket. Men, historiene herifrå blir gode berre om dei har ein universal verdi, om dei kan bety noko for oss som menneske, uavhengig av kor vi kjem frå og kven vi er. Slik håper og trur vi at våre teaterstykke òg vil bli opplevd.

Stoppestaden av Julian Garner – med premiere 26. februar – er unntaket som stadfestar regelen. Stykket har vore sett opp tidlegare, både på Torshovteatret og på Trøndelag Teater. Nokre gonger skal ein ikkje grunngi val av stykke ut frå andre grunnar enn at historien som blir fortalt er så god at det er vanskeleg å la vere. Stoppestaden er eit slikt stykke – ein psykologisk thriller av beste merke.

26. mars er det klart for urpremiere på Matias Orheim – med felespel, ord og glasmusikk, eit stykke om salmediktaren frå Stårheim, Matias Orheim, og kona hans, Marie. Stykket er skrive av Mette Brantzeg og Norvald Tveit. Teatret gler seg til å vitje kyrkjer over heile fylket med ei forestilling fylt av song, musikk og ein historie om to ekstraordinære menneske.

Vi har eitt gjestespel på programmet i vår. Ein av landets største skodespelarar, Bjørn Sundquist, gjestar teatret og Åmot Gard i Bygstad med På viddene av Henrik Ibsen i slutten av april. Gjestespelet er ein del av eit godt samarbeid med ein aktør i kulturlivet som deler kunstsynet, visjonen og verdiane til SoFt.

Kinnaspelet – Songen ved det store djup av Rolf Losnegård blir tradisjonen tru spelt i midten av juni – for 26. gong i år. Ny instruktør av året er Bodil Kvamme. Kvamme er tea

trets faste dramaturg. Ho har m.a. markert seg det siste året som instruktør for det kritikarroste stykket Ishuset av Marit Tusvik. Vi er spente på kva ho vil tilføre Kinnaspelet i år og dei neste to åra ho har ansvaret for stykket.

Haustsesongen startar med Du anar ikkje av Aslak Moe. Moe var sist ved SoFt i 2005 som instruktør for Saman skal vi leve, ei framsyning bygd på historien til Arve Beheim Karlsen. Denne gongen er han tilbake med nok eit stykket bygd på ei verkeleg hending – historien om Tor Henning Karlsen, som opplevde alle ni åra på barne- og ungdomsskulen som eit samanhengande mobbehelvete. Stykket har urpremiere 3. september og blir spelt som klasseromsteater for elevar på ungdomsskulen og i vidaregåande skule.

Siste produksjon i 2010 er bygd på romanen Tyl av Halvor Folgerø og Finn Tokvam. Bodil Kvamme står for dramatiseringa. Stykket som er fullt av vestlandsk humor og tristesse, feel-good og vemod, har urpremiere i Førde 11. desember.

Det er ikkje tilsikta, men i 2010 presenterer SoFt tre stykke med referansar til kvart av dei tre fogderia i fylket – Matias Orheim frå Nordfjord, Tor Henning Karlsen frå Sunnfjord og Tyl frå Sogn. Velkomen til eit variert teaterår, med historier herifrå!